@@ رمضانيات .. اسرار.. الغاز .. واجبات @@

السلام عليكم

مبارك عليكم الشهر الفضيل وان شاء الله يمر على خير مع انى زعلان شويه لانى اول مره بنصيم بعيد عن أهلى .. يلا الشكوى لغير الله مذله ... المهم بما انه رمضان وجو مسابقات والغاز ... وصلنى واجب او *تاج* زى ما يقولو *تقرويطه* وقلت خليها لرمضان حتى ان صاحبت مدونة الفاصلة زعلت وتبو الحق قلت فرصه نغير الاجواء بعد الموضوع الاخير *باص عيون* يعنى والا انى مش متعلم نكتب موضوع كل اسبوع
فلهذا بنجاوب واجبى وامرى لله وأطمنى يا نسيم ليبيا ربحتى الرهان خلاص اهو جاوبت الواجب قبلك ... تى والله غير مزنوق* زى ما يقولو المصريين كان هذا خليته لين دار الصنه ... يلا خلونا نبدو فى الواجب مع انه والله واجب صعب لان واحد زى انى كل شىء يبان فى وجهه منين منلقى 6 اجابات امرنا لله

وهادى هيا الاسئله :
س : أذكر 6 أسرار قد لا يكتشفها من يقابلك أول مرة..:

السر الاول : نموت فى حاجه اسمها كرة القدم بس خساره قراية الطب خلتنا نتخلو عن الحلم هذا .. لكن الى الان مواضب عليها ونستغل فى اول فرصه لمزاولتها " فورزايوفى فورزا اهلاوى "

السر التانى: تجاه اصحابى الانتيم والناس اللى نحبهم ديما انى نسأل عليهم وندور فيهم حتى لو هما مش معدلين او بلاصح مش فاضيين لكن ع الناس اللى نحبهم مافيش ملامه يعنى من الاخر اللى ندير عليه كبيده معاش منخنس منه يعنى لا هدا جانى لا هدا ما جانيش مع الناس هادو ما نحسبش فيها

السر التالت : انى مانعرفش ندير شى فى المطبخ اللهم الا تسخين الماكله والا تطييب القهوه ولا دحى ماشى بالحجيبات ... قصدى بالورق اللى كاتبينه ليا اهلى وعلى سيرة الورق بنحكيلكم موقف مره مندير فاصوليا واهلى كاتبين كيف بندير بالحرف وخوك عبدالله فالح بالحرف نطبق امشى امتى ما طابت الفاصوليا استغربت فيها خيرها شكلها بيضا تقول مزوقينها طلعو اهلى ناسيين يكتبو الطماطم ... خليتها زى ما هيا ودرت دحيه وخلاص بعدين جى اللى معاى قالى انتا وين والتطيب وين ...انتا غير هنى على الدحى والطن قبل

السر الرابع : انسان مسالم لابعد درجه ومانحبش العياط والدوشه بس امتى ما تبدا مباراه تلقى كل الهدوء هذا فى خبر كان

السر الخامس : دهشتونى .... مممممم مجنون بحاجه اسمها بلاى ستيشن مع انى مانلعبش فيها الا اذا كانت كوره بس ... امتى ما نتلاقو نظمو حتى فى دوريات وكاس عالم واحلام يقظه هههه ... شكون يندرى مرات نشوفو ليبيا فى كاس العالم

السر السادس : واخيرا ... ماعنديش روح مع حاجه اسمها الكترونات باى انواعها ( برباش كبير ) نحط راسى براسها ... والفاصلة طلعلكم منافس ههههههه بنطيحلكم السوق بتاعكم youma لين نجيب خبرها

وتوا نجو الى شروط المسابقه

قوانين الواجب:

اولا : أذكر اسم من طلب منك حل هذا الواجب

الله يمسيها بالخير هنا بتاع مدونة الفاصله مش عارف شن مدايرلها بس اظنى مشت فيها ايبارى بعض الناس اللى هواهم عليل

. تانيا: حول هذا الواجب إلى ستة مدونين، وأذكر أسماءهم مع روابط مدوناتهم في موضوعك

تبو الحق خطرو عليا هلبه ناس بس كل واحد وظروفه يعنى وعن نفسى اخترتهم لسببين واحد زيادة معرفه بالمدونين الجدد والتانى شماته فى بعض الناس مع انه فى ناس طلعو منها بس لظروفهم زى
DTD . ANGLO . LIVINGPARADOX

نبدو فى السداسى بتاعنا

Sweet-kid اهلا بيك الى عالم التدوين والتقرويط

fragola لازم نرحبو بيك فى عالم التدوين والترحيب لازم يكون على اصوله

LIVE LIFE قالولى تبى عطله فى رمضان .. اهيا عطلتك

Deep inside حتى معاش تتشمتى فى يوما

alwafy بمناسبة افتتاح المدونه

Crowded Mind حتى معاش تشكى من الكميونتى

قبل لا ننسى قوانين الواجب:
1. أذكر اسم من طلب منك حل هذا الواجب
2. أذكر القوانين المتعلقة بهذا الواجب
3. تحدث عن ستة أسرار قد لا يكتشفها من يقابلك للمرة الأولى..
4. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.
5. اترك تعليق في مدونة من حولت الواجب عليهم، ليعلموا عن هذا الواجب

يـــــــلا ســــــلام ومبروك عليكم الشهر