Sunday, December 27, 2009

@@ الحــج على الـطـريقـة الليـبـيـة @@

بسم الله ...
أولا حمد الله ع سلامة حجاج بيت الله الحرام وإن شاء الله حج مبرور وذنب مغفور ...
الحج على كثر ماهو سعادة غامرة وفرصة عمر على كثر ما أًصبح هاجس يثقل كاهل الحاج نفسه !!
الحج فى ليبيا حسب هالسنة مثلا تقريبا 6000 ألاف دينار للشخص مش موضوعنا ^_^
حنتكلم عن عادات وطقوس تصاحب هالرحلة وما يتبعها ...
المشــهـــد الأول
يا حـــاج فلانى " طبعا مازال ماحجش " اسمك طلع ف القرعة مبروووووك وتى الزردة !!
الحويجة " طبعا مازال ماحجتش حتى هيا " ( لولولى ) لأخر الشارع من حقها لهنى ومش موضوعنا
المشهـد الثـانى
الحاج الفلانى " تى مش قلنالكم مازال ماحجش " طلع اسمه فى القرعة خلى بنمشو نباركوله ونطمنو عليه قبل ما يشمى " منورين شباب فيكم الخير والله " ^_^ ...
ماسمعتيش يا فلانة مش الحاجة الفلانية " تى مش قلنالكم مازال ماحجتش " طلع اسمها فى القرعة والشارع كله زغاريط ودربوكة خلى نلحقو قبل ما نطلعو مش أهل واجب " منورة والله ياحاجة " هادى حجت السنة اللى فاتت...
كــلاكيت أول مــرة
مش حنتكلم ع مشاق الرحلة وظروفها والأشياء اللى تصاحبها " مش موضوعنا " وبرأى هنا الوصف يكون ابلغ للى عاش التجربة عليه أكتفى بالمرور عليها ...
المشــهــد الثالت
فى المطار وصلو الحجااااااااااج وين الزكرة يا فلان الدربوكة يا بنت ... زغرطى يا مراه ... قصدى مش مبالغه ره ساحة للفنون الشعبية وللأسف يكون وقتها راجع وهو مغتسل من الذنوب فأول درجة فى المطار تعيد الوضع الى ماهو عليه شئت ام ابيت يا عمى الحاج من قالك تعال ليبى !!
المشــهــد الرابع
دقيقة بناخد طاسة مية هنى الريق بينشف ^_^
أمواج بشرية يوميا للزيارات والأوقات طبعا دائما مفتوحة فلا ساعات الصباح الأولى تسلم ولا أخرها تنجو بنفسها والحاج اللى تو بالحق بنقولوه حاج لم ينل قسطا وافيا من الراحة حتى أنه لم ينعم بنعمة ترميش العين ولا الحاجة " مبروك حتى هيا حاجة رسميا الأن استطاعت أن تحضن بناتها وتشبع منهن !!
كيف حتحضن وهيا من فلانة الى فلانة وكل فلانة حتعاودلها نفس الحدوتة أكيد تتذكرو صالح الابيض شن دار فى نفس هالموقف " سجل كلامه وقعد يشغل فى الشريط لكل واحد يجى يسلم عليه " واللى ما أذكرش مش مشكلتى من قالك ماتابعش مسلسل صالح الابيض ع الراديو ^_^
والبنت وين حتحصلها أصلا مسكينة أصبحت أسيرة للمطبخ ومن صفرة لصفرة ومن غدى لعشى
كــلاكيت ثانى مرة
طبعا قبل هذا كله الاستعدادات بلغت أوجها قبل رجوع الحجاج الحوش زوقناه الحلاوات حجزنا فيهم .. والخضرة شرينه السوق كله ...
والشغالات تهنينا عليهم والأهم طبعا وصينا الحاج والحاجة ع هدية لكل زائر ع الاقل عويد بخور أو شويشة مية زمزم
المشهد الأخير
الحاج مش قلنالكم حج مسكين تعبان وضغطه ارتفع مش منه من المصاريف والسكر عالى مسكين اضطر يساير كل واحد بطويسة الشاهى وطرف المقروضة !! ...
الحاجة تى والله إلا حاجة مفاصلها يتخلخلو مع بعضهم مش منها من الحركات الاكروباتية بتاع تسليم الليبيات والتنفس تشكى قالت النفس يهرب عليا مش منها من حكاوى العلم والمغامرات اللى تحكى فيهم بدون ماتاخد حتى نفس بين الحكاية والتانية " ...
كـــلاكيت ثالت مرة
فى صديق قالى إن واحد من أقربائه عازم ع الصالة بمناسبة رجوعه من الحج !! نــو كومنت
المشهد الأخير هالمرة الأخير بحق وحقـيق ^_^
الحاج والحويجة ربى يحفظهم عرفتو توا قيمة هالكلمة تراكمت عليهم الفواتير المادية والمعنوية والصحية وكل هذا الكل مش عاجبه شىء على رأى خالتك المنوبية حتى البخور جانى مندى
بكسر الدال !!
وكل عام وأنتم سالمين وإلى الحج إن شاء الله منطلقين والأهم من استطاع إليه سبيلا يا محرومين

وأعـــذرو شطحـــاتى الهياميــــة ^_^

ومــضــة هـيــامــيـــة
لو عندكم موقف صارلكم ف العيلة تبع هالموضوع أحكوه وما تتحشموش " كلنا ليبيين ره " ^_^


قـفــــلة هياميــــة
هذه الصورة أعدت خصيصا لهذه التدوينة فشكرا للزميلة المبدعة رانيا


ســـــــلام

5 comments:

  1. في احدى دول آسيا الاسلامية عندما يحج شخص مسؤول ويرجع يضاف الى القابه لقب (حاج )حتى انه يضاف الى ختمه الخاص في العمل رمز يدل على انه حاج !!! عموما ما انقول الا حج مبرور وذنب مغفور

    ReplyDelete
  2. هههههههههه والله فعلا مأساه بص صورتها بطريقه فكاهيه حلوه و مش غريب عليك
    بالنسبه لعيلتنا من سنتين فاتو امي حجت بس حجتها جت مع مناسبه تانيه يعني هكي هكي خشينا في جو العزايم بس زكره و نوبه و مانعرفش شنو لالالا ماعندناش في عليتنا ربي الحمد لله هاديهم
    تعرف ميوش حتكتب احسن تعليق في الموضوع هدا بحكم كيف مجربه
    سلام

    ReplyDelete
  3. ما يسمونه الليبيون بالمجاملات في مختلف المناسبات دائما يتحول إلى معناة حقيقية للأسرة كلها
    والمشكلة أنه وبالرغم من ان الجميع يشتكى من هذا الوضع إلا أن لا أحد يجرأ على التوقف أو محاولة التلطف في المجاملة

    أو لعلهم ينتقمون !!!

    ReplyDelete
  4. elekomm - إليكــم
    حتى احنى هكى شن الفرق !! ... بس ع الطريقة الليبية

    Meme
    ماقلتيش شنو هيا المناسبة التانية ^_^ ... ميوش اكيد مستنيين تعليقاتها العفوية ... بس نحس فيها حتتفظ نظرا لدبلوماسيتها المعهودة
    =^_^=

    LazyGirl
    زيارة اولى اسعدتنى ... وزى ما قلتى مافى حد يحاول لانه ببساطة لو فكر مجرد تفكير بس اكيد حيعتبر دخيل ع المجتمع ومن المطالبين بقص حبل التواصل والمودة لاننا باختصار مبدأ الوسطية لا نعترف به

    ReplyDelete
  5. السلام عليكم

    والله تدوينة ولا اخطر ههههههه


    وااووو ايش نحكي لنحكي في حجة باتي من سنين وصل معانا اننا اضطرينا أنديروا خيمة هالقد قد كبرها

    بس الموقف اللي قتلني من الضحك وزعلني فنفس الوقت هذا بس بيش تعرف الجردقة
    الخمية اللي درناها شلناها ثاني يوم الصبح ، قبل ما نشيلوها مرت صديقة قديمة لاختي قريب من الحوش خصوصا انه ع الطريق الرئيسي
    المهم استغربت ليش في خيمة، وصدفة في اسماء الوفيات في واحد اسمه كيف اسم باتي مشت تحسابه باتي فارق بعيد السو
    جت ثاني يوم لابسة اسووود ياساااتر ومعاها حماتها وبنتها
    ولقت امي عند الباب قالت لامي البركة فيكم ، امي قالتلها البركة في سيدنا محمد
    جتني امي فوق وقالتلي انزلي شوفي في وحدة جايا تعزي نزلت نا ولقيتها صديقة اختي طبعا نا لابسة ومشيكا
    وحي عليا نا باتي بس كان ايعطس نضايق وايش منظري ونا مشيكة وهو مفارق
    المهم عزتني والبنت مخنوقة تبي تبكي بس ما لقت مبادرة مني
    قلتلها كنك
    قالتلي وهي مصدومة من برودي
    والله يا زنوبا ما سمعتها الا بالصدفة انه توفى
    تي عطك هنا هههه
    طبعا نا عرفت شنو تقصد بس قلت نفور اعصابها
    قلتها قصدك من اللي توفى
    قالتي كيف مش باتك
    قلتلها لا باتي جا من الحج عطيك الصحة
    وتقعد تبكي وتبكي وتقول سامحني ، والموقف البايخ ان عماتي الاثنين اللي ما يحملن في باتي تكة الابرة كانن قاعدات وشوي يبن يصبن يضربنها ومرات عمي تجهز في الشاهي وتدعي عليهن
    والله ما نبيش نطول عليك في الرد

    بس تخيل موقف كيف هكي وتصدق البنت هذه لصبح اليوم معش شفناها لانها تحشمت منا

    يا عمي كلهن ايام وعدن

    وشكرا مرة ثانية ع الادراج الخطييير بكل

    وفككم ربي من كل سو

    سلام

    ReplyDelete