Thursday, December 17, 2009

@@ أعـــراسـنـا الـبـهـيـجـة @@


بســم الله الرحمن الرحيـــم

طبعا العرس كان من يوم 23-11 تقريبا وأتفقت أنى والعريس بنخلد هاليوم التاريخى ^_^ لأنه تقريبا تربينا مع بعض وللأسف العرس جى فوق روسنا وماعمرك دير روحك فالح وتعول خليك ديما " خالى قضية " او بالمعنى الاصح " الكلام مش عليك " ^_^ المهم العرس مشى على خير وصاحبنا ناسب " الشراقة " وذالك توطيدا للعلاقات بين المشرق والمغرب ^_^ وتوا ع اساس يقنع فى الناس كلهم يتزوجو من الشرق " تى تى " يلا ما علينا

نخليكم مع العرس فى صــور واللى كان عرس ليبى تقليدى بامتياز ... ولم تنفع محاولات جو " الصالة " لأننا فى المناسبات هادى بالذات مايمشيش معانا الجو هذا ... وتلقى الكل مشمر " السواعد " للهجوم على " البازين " وكل واحد شاد دوره على طاسة " الشاهى " والجموع هايمة مع " الزكرة " وطبعا الحدث الابرز " الخيالة " اللى الصراحة انى بروحى استمتعت بيها وع الاقل حصلنا " دجيرة " بحصان واحد صديق ^_^ طبعا مافيش صورة تحسبا لأى عين ماتصليش ع " النبى " نبقو بعدها تحت وطأة النفس " تى تى " يلا ما علينا حصلنا جو وخلاص ... وزى ما يقولو " مصيرك حتتجوز حتتجوز يعنى حتتجوز وعقبالنا ... وتيتى تيتى كملت الحدوتة

البداية كانت " الفاتـحـة " ع اساس نظام وترتيبات فنادق خمس نجوم


" العزومة " على حد البصر أمواج من الصوانى والصفـــر


انت وحظكـ يا بازين يا كسكسى وطبعا الاتنين لا يخلو من نسب الدهون المرتفعة
^_^


منظر جانبى بسيط لما كان الحال عليه " عقاب العرس حوسة " تى تى



العشية قالو ف خيل قلنا نعيشو التجربة
^_^


بعض المعلومات ع الخيالة
عقد = بكسر العين معناها عدد الفرسان وتتراوح حسب امكانياتهم وفى اللى يوصل لاعداد كبيرة حنى اللى شفناه تقريبا 30 جنب بعض
يقال ان كل ماكان الفرسان اتناء الجرى متلاصقين وفى مستوى واحد يكون افضل واحسن
حركة السوط : الفارس الاول من اليسار واتناء الجرى يرمى السوط الى اخر فرس على اليسار ويتم التقاطه فى حركة لا تخلو من المهارة


صديق أصر ان تكون الصورة تحمل تلات معانى " الغروب , الفرس , الارمادا " تطبيقا لمقولة التواصل بين الحضارات



العريس المصون البس قبل ما تتجوز وكول قبل ما تاخد
^_^


المولدية " أحلى شىء فى الاعراس الليبية " وانت وحظك


جانب من المنشدين وطبعا لا مانع من رؤية بعض المسجات اتناء المديح
نحس فيه ناسى الكلام ويراجع من النقال
^_^



كامرى العروس مش العريس
العريس مادارش " قـلب " كنهذا صورناها
وهذا يدل طبعا على الرومانسية اكتر منها عند المرأة من الرجل
^_^



فـيـديو للخيالة




video



فيديو التدريجة تبع العريس

video


ودامت دياركم عامرة بالافراح والمسرات


ســـــلام

17 comments:

  1. الف مبروك لصديقك وعقبالك بعد متاخد الشهائد الكبيرة
    :)
    والله كويس عرفتنا بشوية من عادات الخمس العزيزة
    رغم حتى ف طرابلس تصير نفس اللقطات من فترة لابائس بيها نظام الخيل بدى كاتر وميصيرش عرس الا بيه شن القصة

    طبعا احلى شئ المولد ف طرابلس يقولو مولد مش مولدية

    عقبال صحابك التانين
    ودامت الخمس افراح ف افراح

    ReplyDelete
  2. مبرووووك مبرووووك العقبال عندك
    بس هالخيل و العريس اللي مقعمز و مبسوط بروحه عادات اما منطقه ؟ الخمس؟

    ReplyDelete
  3. Nasimlibya
    تى انت وين ساكنة ... حتى ف طرابلس يقولوها مولدية ... المولد نعرفوه المولد النبوى الشريف ... نورتى المنتدى

    ReplyDelete
  4. meme

    هاذم عادات أهل ليبيا كلهم ... الفرق اللهما فى انه بعض الناس تخلو ع عاداتهم وتقاليدهم حتى وصل ان العرس يبقى يوم واحد بس ... كل واحد وكيف يحب يكون عرسه

    عقبالكـ يا دوكـ

    ReplyDelete
  5. الف مبرووووووك لصديقك ،وتزين السيارة اعجبني كثيراً

    العقبة للجميع

    تحياتي~ ~ ~ ~

    ReplyDelete
  6. السلام عليكم

    الله مصلي ع النبي وماشاءالله

    حسيتهن قريــــب نفس عاداتنا

    بنت خالتي خذوها في الخمس ما عاش تلاقينا ولا حكينا عشان نسألها كيف كانن الاجواء .

    اصعب موقف هو الحوسة هههههههه رغم ان توا شركات التنظيف دايرات لون بس على قولتهم في طبرق فرحة العرس بحوسته والدق كله يجي على روسنا نحنا الشبابات
    بس بجد مشكور نقلتلي الجانب اللي ديما عندي ناقص في الاعراس لمة الرجالة وفرحتهم اصلا نا ما نشوفش الا في الصبايين اللي يجو ياخذو في الوجبات من جوا و خيتك ما تطلعش ششش عيب يشوفنا حد

    والعقبا لكل عازب يااااااارب

    وحلو الخيل جو اجواد

    سلامات

    ReplyDelete
  7. elekomm
    السيارة بس ؟؟
    وانى داهش نعدد من بكرى ف الخيل والزكرة والبازين والكسكسى ههههه
    اسعدت بمرورك اخى


    Zanopia elsh7ebe
    أهلا بسكان طبرق والله
    ايه ماعندناش بنات يشبحو من الخيمة ^_^ .... الحق انى متعاطف معاكم ف العراس بنات حواء هههههه بس توا خلاص راحت كلها ف الصالات بالخدم والحشم

    ReplyDelete
  8. السلام عليكم..
    مبارك زواج صاحبك والعقبى لك...
    وشكرا إنك عرفتني على العرس الليبي وطقوسه
    حبيت الخياله...
    ..
    دمت بخير

    ReplyDelete
  9. السلام عليكم ورحمة الله

    ايوه يا عبدالله بوست جديدة برائحة الخمس العبقة

    توه خلى نفصص البوست نقطة نقطة

    رغم ان الصالة الى فيها الفاتحة مدايرة عالم الوان لكن على كلامك المهم الفرحة مش مهم المكان

    اما بنسبة لقصة البازين والكسكسى فا 2 مش صحاب انى وياهم ...رغم انه بصلة الكسكى متاع العرس تبدا فايحة من بعيد لكن الله غالب معنديش فيهم نصيب الزوز

    حكاية الخيل حنى عندنا فى طرابلس ظاهرة قد تكون معدومة وتتميز بيها بعض العائلات بس يعنى مش حاجة رسمية فى عرسنا ...لكن بصدق الفيديو عجبنى خصوصا بخلفية صوت موبايل النوكيا و دوشة صحبنا اعطت للفيديو نكهة مميزةو خاصة

    نجو للمولد والتدريجة (( ايه اسمه مولد فى طرابلس مش مولدية ولا مش عارفه كيف سميتها )) انى شخصيا نحبه رغم حنى البنات فى المناسبات منسمعوش فيها الا لو كان العرس حوش جيرانا ومنكونش ماشية للفرح فنقدر نسمعها بوضوح من حوشنا

    احلى لقطة فى البوست

    صورة المنشد وتعليقك عليه ضحكت من وسط قلبى وخاطرى

    و

    صورة سيارة العروسة الى لعبين فيها الخربقة
    متقوليش خيركم ... وبعد التدقيق والتمحيص الميوشى اكتشفت انه الى ملونها مداير الزقاطة على اساس العروسة متبانش فى السيارة والقلب جاى من جيه السواق باش يقدر يفرز الطريق

    من الاخير بوست بجديات جديد على هايم بكل المقاييس

    مى ..ميوش ...واشياء اخرى

    ReplyDelete
  10. نهــــــــــار
    سعيد بزيارتك وان شاء الله ماتكونش الاخيرة
    بالانتظار العرس المصرى
    ^_^

    may
    مى وتحليلاتها الابداعية القصقصية
    قصدى حتى تشرينة النقال سمعتيها تى تى ع السمع عندك هههههه انى بروحى ماركزتش

    بالنسبة للسيارة ههههه ايه حنى ماعندناش عرايس يبانو من السيارة تروح لحوش بوها طول
    ^_^

    ReplyDelete
  11. السلام عليكم

    بسم الله الله اكبر

    كيف يا عبد الله ما سمعتهاش ؟؟؟

    اسمع بجديات تحتاج لكشف عيون راهو انى قلتلك قبل ما يصير منك دكتور رسمى وتلعب فى الناس ههههه

    وبعدين تعاله جاى شنو القصقصية انى قلت توه فى ملعب هايم فلازم نكثف جهودى بالك نقدرو نلحقو على تقصقيصك حتى ان شاء الله رويحة على طرف الكاشيك

    ملاحظة ...نهار من الامارات مش من مصر فا صحح المعلومة اجرى قبل ما البنت تشوفها...*_*

    ميووش

    ReplyDelete
  12. السلام عليكم /

    الصراحة .. باسم الله ماشاء الله .. عرس ولا أروع ^_^
    ألف مبرووووك لصديقك وعقبال ما نفرحوا بيك حتى إنت
    " طلعت بلدياتي لأن حتى أنا الأصل من مدينة الخمس "

    ReplyDelete
  13. may
    وان شن قلت ماشاء الله لاقوة الا بالله
    شكله نهار غلط فيها وصار عندى تشابه اسماء مش أكتر
    ولا تزعلى نبو نهار تورينا العرس الاماراتى
    ^_^


    وسام
    سعدت بزيارتك اخى ... وانى نقول الولد علاش صقع هكى اتاريك خمسى ههههه ... حلوة مدونتك ع فكرة استمر

    ReplyDelete
  14. السلام عليكم ورحمةالله وبركاته:

    أخي عبد الله

    شكرا على هذه التدوينة المميزة

    ومبارك على صديقك و الفأل لكم إن شاء لله

    أكثر شيء أعجبني في العرس؛ الخيل

    و الذي لم يعجني الزكرة ولفرقة

    نكرهم لاأحبهم أبدا^_^

    ؛؛


    إن شاء الله دائما حياتكم

    مزينة بالأفراح

    وفقكم الله و نور دربكم

    ReplyDelete
  15. in benghAZI WE NEARLY FORGOT ABOUT THOSE SPECIAL SENSES I LOVED THE PICS AS WE NEARLY HERE MISSED THOSE TRYING TO PASS FORWARD WITH WESTEREN WOORLD

    ReplyDelete
  16. السلام عليك
    الف مبروك لصديقيك وعقبالك
    ان شاءالله ديمة بافراح
    سلامي
    اختك
    فتاة من زمن اخر

    ReplyDelete
  17. ♥..♥ الواثقة بالله ♥..♥
    سعدت بزيارتك وعقبالك ان شاء الله يا دكتورة

    WEDA
    tottaly true sis we forget abt our traditional behaviour same here bt always thers exceptions for everything

    holyday
    نورتينا يا هولى كيف سنة خامسة معاك
    عقبالك يا دوك ان شاء الله
    سلامى

    ReplyDelete