@@ أمتـــى العيد ؟؟ @@

السلام عليكم

كل سنة والجميع بخير بمناسبة عيد الاضحى المبارك اعاده الله علينا وعليكم بالخير واليمن والبركات
طبعا ان نكتب توا فى سطور هالتدوينة وقد تم انجاز مهمة شراء اضاحى العيد بعد طول شد وجدب طبعا زى العادة مع البائعين ولا اخفيكم سرا بانه مقارنة بالسنة الماضية الاسعار مرتفعة وتقريبا الضحية الكويسة تبدأ من 350 وطالع فوق ووصلت حتى 600 دينار !! وحسب الكلام المتداول فى السوق ان هالسنة مافيش " مستورد " ولا انى شفت اصلا مستورد طوال تجوالى فى السوق واكتر مالفت نظرى هو الكلام الدائر حول ان ليبيا فى احتمال كبير اضحى فى يوم مختلف عن باقى الدول العربية وبالاخص السعودية واللى لو صارت حتكون سابقة بنظرى واللى متأكد منه ان ليبيا هى الصح بالنسبة لحكاية الهلال لانى انى بنفسى شفته بأم العين واضح وجلى أول ايام دى الحجة " مش موضوعنا " المهم لفت نظرى شىء وكنت فرحان بيه هلبا وهو سؤالى من عدد كبير من الناس عن امكانية توفر اسر محتاجة وغير قادرة على شراء الاضحية والشىء الاسعد انه ع الاقل فى منطقتنا واجهنا صعوبة كبيرة فى ايجاد هذه الاسر طبعا لان اللى يديرو فى الخير مازالو " هلباااااا " وطمنتنى ان الدنيا لسه بخير رغم عدم انكارى بتواجد عدد كبير من الناس المحتاجة ولكن ع الاقل فى هذه المناسبة تقريبا مافى حد لم تتم مساعدته من قبل اهل الخير وانى كنت شاهد ع الشىء هذا " مش
موضوعنا برضو " ... المهم انتو شريتو ضحية او لا غالية او رخيصة فى عصبان ولا " قفاصة " زى العادة ^_^
بالنسبة ليا هاذم عصباناتى من تـــوا مع انى ماناكلش فيه بس برضو واجب الضيافة لامفر منه ^_^ا


كل سنة وانتو بخير وصحة وسلامة وماتنسوش زيارة الاهل والاقارب والاصدقاء
وياريت ماننسوش اخوانا المغتربين فى هالمناسبة ونتمنولهم عودة قريبة الى الوطن وشطيات الريق والتشحوير ^_^

على فكرة هالصورة تو نقولكم قصتها فى تدوينة قادمة " كيـخ كيـخ " نتلاقـــو

ســــــلام