Saturday, May 9, 2009

@@ !! ليـبـيانـيات وربـى يسـتر @@

بسـم الله الـرحمـن الـرحيـم

مـقـدمـه
الخضــار يردد :
والله الخضره هادى الا براس مالـهـا " والله أعلم قداش رابح فيها "
الـجـزار يهلهل :
والله لحمنا الا طازه قرب قرب " والله أعلم من أمتى مذبوحـه !! "
المضيف لضيفـه على وجبـة الغداء :
والله الا عندكـ اللحمـه هادى " باهى أنـى ما ناكلـش فى اللحــم !! "
الطـفل الصغير بعد تـوصيـه من أبيــه :
والله بوى مهناكـ قاعد ما جـــاش " مـرات قـاعد والله أعلم "
المشـجـع عند مشاهدته لمباراة فريقـه :
والله الحكم ظلمنا وكان عندنا ريقولى !! " وفى الإعاده طلعت مش ريقولى !! "
المطرب الفلانـى بصـوت رومانســى :
والله حبك قتلنى يا بنـيـه من وين شفتكـ !! " تى باهـى أهـو أنت قاعد تغنى وتتنفـس !! "
الصـبيـه أتناء حمى العـركـه :
والله إلا ما نقتلكـ ونكسرلكـ وجهكـ " غيـر أوصـل فيـه قبـل !! "
وغيره وغيره ....

الـخــلاصــه :
لماذا أصبحت أشغالنا لا تنقضى الا بهذه الكلمه !!
لماذا أصبح الزبون لا يقتنع الا إذا صحت بهذه الكلمه !!
لماذا أصبحت " لزمـه " لذى كل فئات الشعب الليبى إلا مانـذر !!

وزد عـلى هـذا لم تعد هذه الكلمه ذا مفعول يذكر ربمـا لإيقان أغلبهم أنها مجرد كلمه ع الماشـى
وإن أردت أن تصبح كلمتكـ ذا صـدى مسمـوع فعليكـ الحلف " بالطلاق " إذا كنت متزوجا !!
وبسيدى " المطرشـق " أو " البسـباس " فهؤلاء صـداهـم أعـمق !!

قـفــلــه
كـان ما جيتش لـيـبـى فـاتـكـ الجــو كـلــه


salam

14 comments:

  1. السلام عليكم

    عبد الله

    والله ايام وايام على البوستات المميزة

    من هايم فى حب بلادى

    ويمنى هذا صادق ومش كاذب....

    لكن قوية متاع المغنى

    ضحكتنى يعطيك الصحة وخلاص

    وخيتك مى

    ReplyDelete
  2. ماقريتش البوست يا دكتور لكن جيت نجري اهو نحجز التعليق الثاني
    لي عودة

    ReplyDelete
  3. السلام عليكم
    يا أهلا ومرحبتين بالغائب الحاضر
    سرني جدا انك كتبت من جديد وسررت أكثر بمحتوي موضوعك
    فعلا ربي يستر توا الواحد شنو بيقول غير ربي يهدي
    دمت مميزا ومبدعا في اختيار المواضيع
    راك تغيب خليك قريب وان شاء الله نسمعوا عليك أخبار اكويسة
    أستودعك الله

    ReplyDelete
  4. ههههههههههه..
    كلامك صح يا عبد الله.. بس الحق كل الحق معاك.. ليش الحلفة بدت زي صباح الخير.. وخاصة لو الشخص بيكذب.. وبيمشي اموره..
    "قالو للحرامي احلف قاللهن اجالي الفرج" يعني ايمان الناس بكل ضعف..
    بالنسبة ليا نخاف نحلف ووكان تبي تعرفني نكذب والا نقول في الحق قولي احلفي..
    باهي امالا والله والله والله..
    والا نقولك بلاش.. ههههههههههه

    ReplyDelete
  5. ايه نسيت نقولك ما طولش الغيبة يا دكتور راهو خليت مكانك

    ReplyDelete
  6. اهلا وسهلا بعبد الله اخيرا شوفنا بوست جديد
    ان شاء الله اخبارك تمام
    فكرتني في وحده يحكوا عليها تلاقت مع واحد مصري يبيع في الطواسي هادم الي يصيحوا قرب قرب الطاسه بجنيه المهم شكله علق فيها مشي جاته قتله شن هذا الي تبيع فيه
    جاوبها دول طواسي ياحاجه
    المهم المرا قعدت تقلب فيهم وتقول طواسي القهره والعازه
    الراجل يحسابها شكرانيه
    دوره تسمع فيه يقولبعد مامشت قرب قرب طواسي القهره طواسي العازه
    ^_^

    الشاهد عندك الحق في كل الي قلته ربي يهدي وخلاص
    :)

    ReplyDelete
  7. هههههههه ماهو هادي علامه الجوده لليبيين
    صارت عاده بعيد عنك
    صحيت على البوست ضحكتني و من غير و الله

    ReplyDelete
  8. may
    حلو ان ترسم ع وجه احدهم الابتسامه حتى وان كانت ساخره

    فــاتــن
    لو تفكـونا من حكاية الحجز هادى ,,, وتركزو فى مضمون البوست نفسه يكون أفضل

    gigi
    الباين انى بروحى قعدت الكسول فيكم
    شاعرنا الشعبى مبدع وبامتياز

    ReplyDelete
  9. فاتـــن
    صح كلامكـ وعجبنى المتل لانه مناسب مع انى الكلمه ماعادت عندها مفعول لا يمان الاغلبيه انها تنقال هكى وخلاص اى بمعنى تكملة للسطر فقط ... اكتشفنا سر اضافى الباين فى شخصية فاتن فتاة الساحل التاجورى


    hana
    مع انى مافهمتش المغزى من الموقف اللى حكيتيه بس ع الاقل ضحكت ع الاخر
    ســـلامى

    ReplyDelete
  10. meme
    مش حنصدقكـ الين تحلفــى
    لــــول
    نورتــى المدونه

    سلام

    ReplyDelete
  11. هههههه
    لو مجيتش الاول فاتك التريب

    خيرك مع فتون خليك كووول حني نبو نحجزو لبعض وانت مفروض تكون عندك وسعة بال لضيوفك يا اخينا عبد الله

    اني نبي التعليق الاخير

    ياريت والله


    بالنسبة توا للبوست واللي قلت ياريت وتتمني علينا نركزو فيه حاضر حنركز وهلبة واكثر من الهلبة بس في تعليق تاني
    ;)

    ReplyDelete
  12. Nasimlibya
    أهلا بنسيم بلادى العليل
    فـاتـن مش محتاجه توصـى عليها اصلا المدونه مدونتها باللى فيهــا ,,, بانتظار تعليقكـ ع البـوسـت نفسـه

    ســلام

    ReplyDelete
  13. السلام عليكم ورحمة الله وبركاته

    اشكرك اخي لزيارة حلمي الصغير

    ما أود قوله بخصوص موضوعك هنا

    قرأت قبل أعوام كتاب للصادق النيهوم ولفت انتباهي موضوع بعنوان (والله بالمجان) ولا ادري لماذا الحلف صار مثل السلام عليكم هنا وفي غيرها من الاماكن

    ذات مرة روت لي صديقة موقف ولكنني لم اقتنع لاسباب واضحة فقالت لي (تبيني نحلفلك براس بوي وامي نحلفلك وتراب الغوالي) ؟؟؟

    ايهما ابقى والدنا اطال الله في عمرهما أم الله
    وكيف نحلف بأمواتنا غفر الله لهم
    صحيح أنه اذا ما قدم المرء على حلف بغير الله اصبح مشركا (الشرك الاصغر ) وبأن الحلف بالله يعد أهونا

    ولكن الورطة بأن الله ليس لعبة لكي نضعه قبل كل اكذوبة وبعدها فهو المتعالي ولا عال سواه

    واليك بهذه النكتة

    (سئل مصريا انتو ليش ديما تحلفوا بالله ///رد المصري وقال واللهي دي إشاعة)!!!

    عسى العقول تنير

    والسلام عليكم

    ReplyDelete
  14. زنوبيا
    مرحبا بكـ هنا كزيارة اولى عسى ان لا تكون الاخيرة
    جميل ما قرأت واعجبتنى نكتة المصرى مضحكة مبكيه فى ان ... نورت المدونة

    ســـلامى

    ReplyDelete